තෑගි එපා අම්මේ මට!

පාට පාට සමනල්ළුන්
 ඉගිලෙන විට මල් අතරින්
මටත් හිතයි දිව යන්නට
උන් පස්සෙන් හනි හනිකට.

කුරුලු රෑන් පියබනකොට
තුරු අතරින් වළා ගැබෙන්
මටත් හිතයි පියබන්නට
උන් එක්කම එක රෑනට

අත් වෙනුවට තටු ඇත්නම්
පියබා යන්නට හැකි මට දැන්
ගණිතය භූගෝලය පොත්
නුඹලාගෙන් නිදහස් මං

ටිවුශන් හෝම් වර්ක් නැතේ
ඇනුම් බැනුම් කිසිත් නැතේ
දුව පැන ගී ගයා නටන
සොඳුරු ලොවක් මටත් ඇතේ

ශිෂ්ෂත්වය මේ තරමට
නපුරු ඇයිද පුංචි අපට
උදේ ඉඳන් රෑ වන තුරු
ටිවුශන් ඇයි මේ විදිහට

ශිෂ්ෂත්වය සමත් උනොත්
තෑගි එපා අම්මේ මට
රෑ හීනෙන් නටන ගයන
සොඳුරු ලෝකෙ මටත් දෙන්න.